Sekoddeśapañjikā
Technical Details
Sekoddeśapañjikā
namaḥ śrīparamādibuddhāya||
natvādibuddhaṃ tribhavaikanāthaṃ
saṃbodhisattvaṃ sahadharmasaṃgham|
śrīmadguroḥ pādakṛtopadeśāt
sekādikoddeśapadaṃ tanomi||
atha vajrapāṇinirmāṇakāyaḥ sucandro rājā paramādibuddhatantrarāje sekārthaṃ bhagavantaṃ pṛcchati| sucandra āheti he śāstaḥ sekaḥ saptavidha udakādyanujñāvasānaḥ| aparas trividhaḥ
kalaśadiprajñājñānāntaḥ| anuttaras tatheti mahāmudrājñānalakṣaṇam| laukikalokottarasiddhyartham iti laukikasiddhir akaniṣṭhabhuvanaparyantam| lokottaraṃ ca buddhatvaṃ mahāmudrākṣarajñānam|
etadarthaṃ saṃkṣepāt kathayasva me mameti|
śṛṇv ityādi bhagavato vākyam uddeśasamāptiṃ yāvat| param iti mahāmudrākṣarajñānam| nāḍīnāṃ vāmadakṣiṇamadhyamā-
(37)
dīnām saṃcāro vāmadakṣiṇamadhyarandhreṣu gamanāgamanam| nāḍisaṃcāram āyāmam iti prāṇāyāmam| uddeśāt te tava kathayāmi||
idānīm uddeśādeḥ prabhedam āha| uddeśas trividhas tantre sarvasmin| tathā nirdeśas trividho bhavet| taduddeśanirdeśayoḥ prabhedam āha| pratyuddeśo mahoddeśa ity uddeśasya prabhedaḥ| pratinirdeśako'para iti mahānirdeśa ākṣiptah| etau ca nirdeśasya prabhedau|
eṣāṃ vyāpāram āha| uddeśa evetyādi| ya evoddeśaḥ sa eva nirdeśaḥ| sa ca tantrasaṃgītir ucyate| atra hi nirdeśaśabdena bṛhattantrasaṃgītir ucyate| bṛhattantrāntrarbhṛtaś coddeśaḥ| sa eva hi saṃgītikārakaiḥ pṛthak kriyate tadānyatantro bhavati| yathā lakṣābhidhānād nirgatam anyatantrābhidhānam| pratyuddeśaś ceti cakārāt
(38)
pratiśabdākṣepe pratinirdeśa ucayate| dvayam etad yathākramam alpapañjikā bṛhatpañjika| sā ca padamātrabhañjikā na sarvārthasūcikā|
yataś tīkā sarvārthasūciketi vakṣyate| mahoddeśaś ceti cakrārād mahacchabdākṣepe mahānirdeśa ucyate| dvayam etad yathāsaṃkhyam alpaṭīkā bṛhaṭṭīkā cocyate|
evam ity uktakrameṇa ṣaṭkoṭibhiḥ ṣaḍvidhair alpatantrabṛhattantrasaṃgītyādikaiḥ śuddhaṃ pariśuddham ādibuddhaṃ kālacakrābhidhānakaṃ syād iti vakṣyamāṇena saṃbandhaḥ| evam vajrayogaiś caturvidhair iti mantrasaṃsthānādvayalakṣaṇaiḥ|
(39)
catuḥsaṃbodhibhir ity ekakṣaṇābhisaṃbodhibhiḥ pañcākāraviṃśatyākāramāyājālābhisaṃbodhilakṣanaiḥ| skandhai rūpavedanāsaṃjñāsaṃskāravijñānalakṣaṇaiḥ| dhātubhiḥ pṛthivyaptejovāyvākāśadharmadhātulakṣaṇaiḥ| āyatanair viṣayaviṣayibhāvena dvādaśabhiḥ| rūpaśabdagandharasasparśadharmadhātulakṣaṇaiḥ| ṣaṭkulaiś cakṣuḥśrotraghrāṇajihvākāyamanolakṣanaiḥ|
satyābhyāṃ laukikalokottarābhyām| kāyavākcittasaṃśuddhyā abhiṣekadvayaṃ dvayam ity udakamukuṭābhyāṃ kāyaśuddham| paṭṭavajraghaṇṭābhyāṃ vākśuddham| māhavratanāmābhyāṃ cittaśuddham| anujñayā jñānaśuddhiḥ| anyair aparā yā śuddhiḥ sā dhātvādiśuddhitaḥ|
(40)
tad āha| udakam ityādi| vajraghaṇṭā mahākṣaram iti vajraṃ mahākṣaraśuddham| ghaṇṭā buddhabhāṣānavacchinnā| saivārkendvekatra tayoḥ śodhanaṃ madhyamāpravāhalakṣaṇaṃ| kumbhādayas tu sekā maṇḍalavartanam antareṇāpi deyāḥ| yataḥ stanāṅgasaṃsparśāt sukhaprāptopalabdhaḥ|
janakaḥ sarvatāyinām iti tāyināṃ pañcatathāgatānāṃ nirāvaraṇatvena janakaḥ| prajñā buddhis tasyā bimbair grāhyagrāhakākārarahitamāyāsvapnābhilāṣalakṣaṇaih|
ata evāha| astināstivyatikrāntair ity abhāva ityādi| iha hy ālambanaṃ dvividham| pratyakṣapūrvakaṃ bhavet| anumānapūrvakaṃ cet| tatra pratyakṣapūrvakaṃ tad vyapagatasakalakalpanākalaṅkaṃ sadgurumārgopadeśajātatattvayogād gaganetārācakravad anekasaṃbhogakāyaṃ māṃsacakṣurgrāhyam| prathamaṃ māṃsacakṣuṣādikarmiyogi viśvam abhijñām antareṇa paśyati|
(41)
tato divyacakṣuṣābhijñāvadhivaśāt| tato buddhacakṣuṣā vītarāgāvadhivaśāt| tataḥ prajñācakṣuṣā bodhisattvāvadhivaśāt| tato jñānacakṣuṣā samyaksaṃbuddhāvadhivaśāt| sarvopadhivinirmuktitaḥ| evaṃ tathāgatasya pañcacakṣūṃṣi māṃsādīni śūnyatādarśanaṃ praty uktāni| anumānapūrvakam ālambanārthaṃ tattvataḥ kalpanaṃ citrādopadarśitaṃ bālayogināṃ śūnyatāmārgāvatāranārtham|
tasmād abhāve bimbe svapnādisadṛśe yā bhāvanālambanaṃ sā yogināṃ bhāvanā kalpanā na bhavaty akalitahetūdbhūtatvāt| ata eva bhāvo vasturūpaḥ| abhāvaś ca sarvopākhyāvirahalakṣaṇaḥ| cittasya yataḥ pratibhāsamānam apahnotuṃ na śakyate| aṇusaṃdohā bhāvāś ca na gṛhyate pratibimbavat|
etad eva dṛṣṭāntenācaṣṭe| pratisenām ityādi| pratisenāśabdena paracintitārtho'bhidhīyate| tām ādarśe darpaṇe'vastujāṃ paramāṇusaṃdoharahitaṃ paśyet| pratisenāvatāratantre kiladarpaṇakhaḍgāṅguṣṭhapradīpacandrasūryodakakuṇḍanetreṣv aṣṭasu pratisenāvatāra uktaḥ| tathātītānāgataṃ dharmaṃ paricintitam ambare
(42)
śūnye sarvākārabimbe tattvayogī labdhanirvikalpamārgaḥ paśyati|
asyāḥ pratisenāyā dṛśyamānāyā yo bhāvaḥ pratibhāsalakṣaṇaḥ sa na bhāvaḥ syāt tad vastu na bhavati| kuta ity āha| vastuśūnyārthadarśanād iti vastunā paramāṇusaṃdohātmanā śūnyovyapagataḥ| sa ca tasyārthaḥ pratibhāsalakṣaṇaḥ| tasya darśanād nirvikalpapratyakṣopalambhāt| vastuno'ṇusaṃdohātmakasyābhāvato'rthaḥ pratibhāsalakṣaṇe'sti| kathaṃ yathā māyāsvapnendrajālavat|
amum evārtham āha| asatītyādi| cintāmaṇir ivetyādi kalpanāpoḍhatvam abhrāntatvaṃ ca jñānasyāha| nanu yad anālambanaṃ tat kathaṃ jagadarthakāri viṣayeṇa vinotpattir ity āha| adṛṣṭim ityādi| sādhakāḥ pratisenāvatārakāḥ|
(43)
sadrūpaṃ paśyatīty api nety āha| asadrūpaṃ paśyatīty api nety āha| yad apītyādi| anyacakṣurbhyāṃ paśyatīty api nety āha| na paśyatītyādi| svacakṣurbhyāṃ tarhi paśyatīty āha| svacakṣurbhyām ityādi| kumāryā yad dṛśyamānam ajātam anutpannaṃ tat tasyā jātakaṃ yathotpannam ity arthaḥ|
prāṇāyāmam āha| dṛṣṭa iti| īdṛśe svapnamāyāsadṛśe bimbe dṛṣṭe sati tatas tadanantaraṃ prāṇāyāmaṃ pūrakakumbhakarecakaṃ nirantaram anavacchinnaṃ kuryāt| kāsv ity āha| ūrdhvetyādi| ūrdhve trināḍī kāyavākcittadharmiṇī| evam adhaś ca|
tatra vāme candranāḍī kāyadharmiṇī| dakṣiṇe'rkanāḍī vāgdharmiṇī| madhye rāhunāḍī cittadharmiṇī| viḍnāḍī kāyadharmiṇī| mutranāḍī vāgdharmiṇī| śukranāḍī cittadharmiṇī| candranāḍī toyasvabhāvā| arkanāḍī vahnisvabhāvā| rāhunāḍī śunyasvabhāvā| viḍnāḍī bhūsvabhāvā| mūtranāḍī vāyusvabhāvā| śukranāḍī jñānasvabhāvā|
(44)
etad āha| candretyādi| prāṇe'pāne krameṇa tā iti| prāṇe candrasūryataminyaḥ| apāne cāvaśiṣṭāḥ|
āsāṃ ṣaṭkulakalpanām āha| candretyādi| candras toyadhātur upāyasya śukradhātoḥ kāyo bhavati| prajñāyā rajodhātor divākaras tejodhātur vāg bhavati| evaṃ vakṣyamāṇe'pi prajñopāyayor aparam evārthaḥ| vibhoḥ śukradhātoḥ prajñopāyāṅgabhāveneti viṣamakulāliṅganena| prajñāṅgabhāvo hy upāye bhavati suratakāle cittasya tadākāratvāt| upāyāṅgabhāvaḥ prajñāyām apy evam|
ariṣṭam akālamaraṇalakṣaṇam adhikamārutair bhavati| ūrdhve'dhaś ca kayor ity āha| kāyavāgnāḍyor yathāyogaṃ lalanārasanayoḥ| yadādho viḍnāḍī niruddhā bhavati tadordhve vāmanāḍyām ariṣṭaṃ bhavati| yadā mūtranāḍī niruddhā bhavati todordhve dakṣiṇanāḍyām ariṣṭaṃ bhavati| etac ca prapañcena vakṣyate| taminīśukravāhiṇyoś cāriṣṭaṃ nāsti| taminīśukravāhiṇyor māruta utpattir garbhād nirgamaḥ| maraṇaṃ sthitiḥ svasthitā|
etad āha| utpādetyādi| lagnodayābhisaṃdhau ceti| vāma-
(45)
lagnād dakṣiṇalagnasaṃkrāntisaṃdhau madhyamā viṣuvaṃ vahati| kati śvāsocchvāsān ity āha| ṣaṭpañcāśad ityādi|
divāniśam ahorātre dvādaśasaṃkrāntau pañcasaptatyadhikaṣaṭśataśvāsān madhyamā vahati| vāmā dakṣinā ca nāḍī pañcasaptatyadhikaṣaṭśataśvāsonān yān ekaviṃśatisahasrān ṣaṭśatair adhikāṃs tān vahati| tripakṣyadhikatrivarṣāṇi ca śatavarṣe pūrṇe vahati madhyamā|
vāmā savyā dakṣiṇordhve prāṇe yathākrameṇa saṃjñā candro'rkaś ca| lalaneḍā cāpi piṅgalāpareti rasanā| toyatejaḥsvabhāvinyāv iti pūrvavad yathākramaṃ padmadhṛgratnadhṛgmate'mitābharatnasaṃbhavādhidaivate|
adha ity apāne madhyamā nāḍī cetyādinā| viḍmūtravāhinyor upary ūrdhvanāḍīdvayasaṃcāreṇa svabhāvam āha| ayam arthaḥ| ūrdhve yā vāmanāḍī sādho madhyā viḍnāḍī| ūrdhve yā dakṣiṇā sādho vāmā mūtravāhiṇī| ete dve yathākramaṃ cakradhṛkkhaḍgadhṛgmate| vairocanāmoghasiddhisvabhāve| ūrdhve yā madhyamā
(46)
sādhaḥ savyā śukravāhiṇī| ete'pi śūnyajñānasvarūpe| akṣobhyavajrasattvādhidaivate|
nābhyabje bhuvaḥ pañcaguṇo gandharūparasasparśaśabdalakṣaṇaḥ| hṛdayābje toyasya caturguṇo rūparasasparśaśabdalakṣaṇaḥ| kaṇṭhābje'gnes triguṇo rūpasparśaśabdalakṣaṇaḥ| lalāṭābje maruto dviguṇaḥ sparśaśabdalakṣaṇaḥ| uṣṇīṣābje śūnyasya śabdamātraguṇaḥ|
etān gṛhītvā saṃhārakrameṇāvadhūtī nirgacchati| sṛṣṭyā ca śūnyādinā ca| kṣitau nābhimaṇḍale viśati|
adho nābhau guhye ca maṇyabje śaṅkhinī kāyavākcittavāhiṇī sattvarajastamobhedena tridvyekaguṇātmikā saṃhārakrameṇa nirgacchati| ṣṛṣṭyā viśati| eṣā śaṅkhinī strīṇāṃ sukhāt surate śukraṃ vahati| ṛtau raja-udbhave raktavāhiṇī|
prāṇāpānanāḍyoḥ prajñopāyāṅgabhāvam āha| ūrdhva ityādi| ūrdhve prāṇe savyāvasavyayor vāmadakṣiṇayoḥ prajñopāyāṅgabhāvo'dho'pāne| ūrdhvādho rajaḥśukrapravāhayoḥ|
(47)
yādhaḥ strīṇāṃ khagamukhā śukravāhataḥ saiva yadā rajo vahati tadā caṇḍālī bhavati| tasminn eva cartukāle strīṇām ūrdhvanāḍī ḍombī bhavati| atrobhayathāpi striyo'spṛśyāḥ| puṃsaḥ puruṣasya tv ṛtukāle śukrāgamanakāle saiva ḍomby avadhūtī syāt|
vāmadakṣiṇanāsāpuṭayor maṇḍalodayam āha| vijñānādyam ityādi| vijñānādyam ākāśādyaṃ sṛṣṭikrameṇa| bhūmyādyaṃ saṃhārakrameṇa| madhye madhyamāmārge ṣaṣṭhaṃ jñānamaṇḍalam ākāśādipañcamaṇḍalāt pratyekamaṇḍalasya sapādaikādaśaśvāsān gṛhītvā sapādaṣaṭpañcāśataśvāsātmakaṃ vahati|
āsāṃ vāmadakṣiṇamadhyanāḍīnām ahorātreṇa yathākramaṃ nābhipadme dvādaśadalātmake ṣaṣṭimaṇḍalāni| vāme ca lagne viṣame meṣādye dakṣiṇalagne same vṛṣabhādye|
tatra dakṣiṇe vṛṣalagne yadā vahati vāyus tadā mūle nāsāpuṭasyādhobhāge bhūmimaṇḍalaṃ daṇḍaikaṃ vahati| evaṃ tasyaiva vāmabhāge toyamaṇḍalam| savye dakṣiṇabhāge tejomaṇḍalam| ūrdhvabhāge vāyumaṇḍalam| madhye śūnyamaṇḍalam| evam
(48)
ubhayor nāsārandhrayor ekaikamaṇḍalaṃ daṇḍād vahati| pañcabhir daṇḍaiḥ pañcamaṇḍalaṃ vahatīty arthaḥ| bhūmyādyam iti copalakṣaṇamātratvāt| ākāśādyam api gṛhyate|
ekā nāḍī kati śvāsān vahatīty āha| nāḍiketyādi| kramād iti kṣāmādinā| ākāśādināyam| pañcabhir gaṇitā aṣṭādaśaśataśvāsā bhavanti| tāṃś ca pañcanāḍyo vahanti| aṣṭādaśaśataśvāsāṃś ca dvādaśasaṃkrāntibhir gaṇitā ahorātreṇa ṣaṭśatādhikaikaviṃśatisahasraśvāsā bhavanti|
etad āha| ṣaṣṭītyādi| vāmanāḍyāṃ lagnodayam āha| dalamadhya iti yadā vāmanāḍyāṃ meṣādinā nāsāpuṭamadhye śūnyamaṇḍalaṃ vahati tadābhyantare'pi dalamadhye vahatīti vakṣyate| tataḥ pūrva ity ūrdhve vāyumaṇḍalaṃ savye'gnimaṇḍalam| vāme toyamaṇḍalam| apara ity adhobhāge pṛthivīmaṇḍalam| kramād ity ākāśādikramāt| ākāśādyam ityādinā pūrvoktam evaṃ prajñapayati|
pañcamaṇḍalānāṃ parasparaṃ prajñopāyabhedenāha| apara ity adhomaṇḍale| pūrva ity ūrdhvamaṇḍale yathākramaṃ dharā pṛthivī vāyuś ca| anayoḥ parasparaṃ prajñopāyakāraṇam āha|
(49)
aṅguṣṭhetyādi| āṅguṣṭhaḥ pṛthivīsvarūpo'nāmikā vāyusvarūpā| etābhyāṃ parasparaṃ prajñopāyatvaṃ grāhyagrāhakabhāvena| tathā hi parakulāliṅganena kāryodayo na svakulāliṅganena svātmani kriyā virodhāt| pṛthivīdhātūdbhūte hi kāyendriyam| vāyudhātūdbhūtaṃ hi sparśyendriyaṃ viṣayaṃ gṛhṇāti| ata ucyate| aṅguṣṭhānāmikābhyām ityādi|
evaṃ savyavāmayor agnitoyayoḥ prajñopāyakāraṇam āha| savyetyādi| atrāpi vahnidhātujanitaṃ rasaviṣayam| toyodhātūdbhūtaṃ rasanendriyaṃ gṛhṇāti| ato madhyamātarjanīdvābhyāṃ khaḍgo bhaviṣyati|
daṃṣṭrā mudrā pakṣamudrā kṛtiḥ| kartarīti kartarikā mudrā kanīyasī| te parasparānye| śunyamaṇḍalasaṃyoga iti vāmadakṣiṇavāhināṃ daśamaṇḍalānāṃ saṃyoga ekatvaṃ madhyamā-
(50)
pravāhaḥ| tato'ṅgulīnāṃ pṛthivyādisvarūpiṇīnāṃ parasparam| karatale puṭite mūrdhni śirasi kṛta ekamukhaṃ vajraṃ bhavati| anenaitad upalakṣitam| madhyamāpravāha yogenācyutasukhena bodhicittoddhāriteṇa sā vajraśikhāyāṃ kartavyā| tad eva kartarikam| ajñānasya cchedanarūpatvāt|
skandhādi vijñānādayaḥ| dhātavaḥ pṛthivyādayaḥ| trivajrāṇi kāyavākcittāni| evam ekatvaṃ bhavati madhyamāgatau satyā| ariṣṭalakṣaṇam āha| vāmāyām ityādi| vāmāyāṃ dakṣiṇāyāṃ vā yathākrameṇādhiko vāyur ekarātram|
sattvakṣayato varṣam ekaṃ na bhavati| punar aparavarṣadaśadinaṃ bhavati rajaḥkṣayārtham| punar na vahati| punar aparavarṣapañcadaśadinaṃ bhavati tamaskṣayāntam| viṃśatidināroham āyurmāsāḥ ṣaṭ| pañcaviṃśatidināroham āyurmāsāḥ trayaḥ| atra
(51)
hi sūryaś candraguṇāñ śabdasparśarasarūpagandhān gṛhītvāriṣṭadināni darśayati| te pañca pañcakena pañcamī yāvad vṛddhiḥ| tataḥ ṣaṣṭhasaptamarāśāv ekottareṇa kramād vṛddhir iti| saptame rāśau pauṣṇakālaḥ| yatra prāṇasya nivṛttiḥ kaiścid api kartuṃ na śakyate| śukradhātāv ariṣṭavāyupraveśāt| tataḥ pauṣṇakālāt śukradhātukṣayārtham| aṣṭamapatrādiṣu krameṇa trayastriṃśaddinārohaḥ|
atra dvādaśarāśicakram| avidyādvādaśāṅgasvarūpaḥ puṭo bhūmyādau likhitvā prathamapuṭe pūrvādiṣu makarādijanmarāśiprabhṛtāv ariṣṭadināvaśeṣāyuṣo varṣamāsadinabhedena yathākramanyāsam āha| tridvītyādi| samakair varṣair māsaiḥ ṣaṭtriyugmendubhiḥ| dinais tithidikpañcaguṇadvyekaiś caivaṃ dehinām āyur gacchati| dvitīyapuṭaṃ coddeśamātreṇānugatatvād dinatyāga ucyate| pūrve janmalagnapatre trivarṣād aśītyuttarasahasradinagaṇād makarāt pañcatriṃśadadhikaśatadinagaṇaṃ tyajati| tatas tad apatraṃ śūnyīkṛtya dvitīyapatre'vaśeṣadinagaṇaṃ gṛhītvā prāṇaśaktiḥ praviśati| tatrāpy ārohadinadinaiḥ saha pañcacatvāriṃśadadhikatriśatadinaṃ tyajati| tato dvitīyapatraṃ śūnyīkṛtyāvaśeṣadinaṃ
(52)
gṛhītvā caturthe praviśati| tatrāpy ārohaṇadinaiḥ saha dvyaśītidinaṃ tyajati| tataḥ patraṃ śūnyīkṛtyāvaśeṣadinaṃ gṛhītvā pañcame praviśati| tatrāpy ārohaṇadinaiḥ saha saptapañcāśaddinaṃ tyajati| tataḥ ṣaṣṭhe'vaśeṣadinaṃ gṛhītvā praviśati| tatrāpy ārohaṇadinaiḥ sahāṣṭāviṃśaddinaṃ tyajati| tataḥ ṣaṣṭhaṃ śūnyīkṛtya saptame praviśati| tatrāpy ārohaṇadinaiḥ saha saptaviṃśaddinaṃ tyajati| saptamaṃ śūnyīkṛtyāvaśeṣaṃ ṣaḍviṃśatidinagaṇaṃ gṛhītvāṣṭame praviśati| tatra pañcadaśadinaṃ tyajati| aṣṭamaṃ śūnyīkṛtyāvaśeṣam ekaviṃśatidinaṃ gṛhītvā navame praviśati| tatra daśadinaṃ tyajati| avaśeṣam ekādaśadinaṃ gṛhītvā daśame praviśati navamaṃ śūnyīkṛtya| daśame pañcadinaṃ tyaktvāvaśeṣadinaṃ gṛhītvaikādaśame praviśati| tatra dinatrayaṃ tyajati| tata ekādaśamaṃ śūnyīkṛtyāvaśeṣadinatrayaṃ gṛhītvā dvādaśame praviśati| tatra dinatrayaṃ tyajati| avaśeṣaṃ dinam ekaṃ gṛhītvā karṇikāṃ praviśati| evam aśītyuttarasahasrasaṃkhyaiḥ
(53)
sarvasya madhyasya trivarṣadinaiḥ prāṇaśaktir dvādaśarāśicakraṃ tyajati| tato vijñānam api tyaktvā śvāsacakradharmapreritaprāṇavāyur nāsārandhragatyantare saṃbhramati|
vāmanāḍyām ariṣṭaṃ darśayati| mūlād ityādi| mūlād iti prāṇasya janmarāśidinād ekottareṇa candrasyārohaṇakrameṇa caturmāsapakṣabhedādinā| tatrāpi pūrvavad dvādaśacakraṃ likhitvā prathamapuṭe'riṣṭadinaṃ ṣaṭtriṃśadāyurmāsās tu dvitīyapuṭe sthāpanīyāḥ| tato māsam ekaṃ na vahati| ariṣṭavṛddhidvitīyamāsānte tṛtīyamāsapraveśe tasminn eva patre dinadvayaṃ vahati| tatas tṛtīyamāse na vahati| caturthamāsānte pañcamamāsapraveśe dinatrayaṃ vahati| evaṃ ṣaḍmāsair ariṣṭadināni trīṇi| sāmānyadinādau trīṇi ratnasavyavāmāriṣṭadharmiṇi| eva ṣaṭtriṃśadmāsebhyo'riṣṭadinasahitebhyo jīvitasya ṣaḍmāsā gatāḥ| tasmin patre prāṇavāyur asaṃcāraḥ| evam ahorātreṇaikādaśasaṃkrāntibhiḥ karoti| dvyayutadvāṣṭaśataśvāsaiḥ patraparityāge'pi śvāsacakrasyonatā nāsti|
(54)
tato dvitīye punaḥ saptāṣṭanavame ca māse yathāsaṃkhyaṃ catuṣpañcaṣaḍdināni vahanti| tatas triṃśadmāsarāśer aparamāstrayaṃ jīvitasya gatam| tataḥ saptāviṃśatimāsān gṛhītvā tṛtīyapatre saṃcarati| daśapatreṣu daśasaṃkrāntibhir ahorātraṃ karoti| pratyekamāse yathākrameṇa saptāṣṭanavadināni vahanti| saptāviṃśatimāsebhyo māsatrayam ūnaṃ bhavati| evaṃ yathoktavidhinā tṛtīyarāśipatraṃ tyajati| navapatreṣu saṃkramaṇaṃ karoti| evaṃ daśadinam ekādaśadinaṃ dvādaśadinaṃ vahati| caturthapatraṃ tyajati| caturviṃśatimāsebhyo māsatrayam ūnaṃ bhavati jīvitasya| evaṃ trayodaśadinaṃ caturdaśadinaṃ| tataḥ pañcamaṃ patraṃ tyajati| saptapatreṣu saṃkrāntiṃ karoti| ekaviṃśatimāsebhyo māsatrayam ūnaṃ bhavati| tathā ṣoḍaśasaptadaśāṣṭādaśadināni trimāsaṃ yathākramaṃ vahati| ṣaṣṭhapatraṃ tyajya ṣaṭpatreṣu saṃkrāntiṃ karoti| aṣṭādaśamāsebhyo māsatrayam ūnaṃ jīvitasya| ekonaviṃśatyekaviṃśatidināni pratimāsaṃ yathākramaṃ vahati| saptamarāśiṃ tyajati| pañcarāśiṣu saṃkrāntiṃ karoti|
(55)
pañcadaśamāsebhyo māsatrayam ūnaṃ jīvitasya| evaṃ dvāviṃśatitrayoviṃśaticaturviṃśatidināni yathākramaṃ vahati| aṣṭamapatraṃ tyaktvā catuṣpatreṣu saṃkrāntiṃ karoti| dvādaśamāsebhyo māsatrayam ūnaṃ jīvitasya| evaṃ pañcaviṃśatiṣaḍviṃśatisaptaviṃśaddināni yadā vahati tadā navamaṃ patraṃ tyajati| patratrayaṃ saṃkrāntiṃ karoti| navamāsebhyo māstrayam ūnaṃ jīvitasya| evam aṣṭāviṃśatitriṃśatidināni yadā vahati tadā daśamapatraṃ tyajati| patradvaye saṃkrāntiṃ karoti| ṣaḍmāsebhyo māsatrayam ūnaṃ jīvitasya| ekatriṃśaddinaṃ dvātriṃśaddinaṃ yadā vahati tadaikādaśamapatraṃ tyajati| ekapatre saṃkrāntiṃ karoti| trimāsebhyo navatidināny ūnībhavanti jīvitasya| tataḥ pūrvapatre'vāhitadinatrayād dvādaśame patre dinadvayaṃ vahati| tato dvādaśamaṃ patraṃ tyajati| tataḥ karṇikāyām ekadinaṃ vahati| yāvat prāṇasya sa cakravicchedo bhavati vāmāriṣṭeṇa maraṇam ayogino yānti|
(56)
madhyametyādi| mṛtyoḥ kālasya śatavarṣe pūrṇe madhyamārohaṇaṃ samaviṣamadinair vṛṣādimeṣādyair janmajātaiś ca maṇḍalaiḥ pṛthivyādikaiḥ| pakṣadvayavināśanād dakṣiṇavāmapakṣakṣayāt| anyathetyādi sugamam|
ariṣṭavañcanārtham āha| ariṣṭalakṣaṇam ityādi| prāṇaṃ prāṇavāyuṃ lalāṭe nyaset| avadhūtīpadaṃ madhyamāpravāhitvam|
anyathetyādi| yadi tat prakarśati na bhidyate| vajrotthānadvāreṇāvadhūtimārge prāṇamāruto na viśati|
adhaś cāpānavāyuḥ śaṅkhinyāṃ na viśati| kim evaṃ syād ity āha| maraṇaṃ tadaveśatas tayoḥ prāṇāpānavāyvor avadhūtyāṃ
(57)
śaṅkhinyāṃ vāpraveśataḥ| maraṇam eva| ānandānāṃ bhedam āha| śukretyādi| uṣṇīṣāt sakāśād ūrṇāpaṅkaje bhrūmadhye śukrasyāgamanam ānandaṃ prathamam| tasmāt kaṇṭhe hṛdi paramānandaṃ dvitīyam| tato vividhaṃ ramaṇaṃ krīḍanagāḍhāliṅganaśītkāra kaṇṭhakūjanādilakṣaṇaṃ nābhau
(58)
guhye ca gataṃ bodhicittaṃ viramānandaṃ tṛtīyam| guhyād vajramaṇiparyantam acyutaṃ bodhicittaṃ sahajānandaṃ caturtham|
tatra tathāpratiṣṭhitanirvāṇaṃ pratiṣṭitayo rāgavirāgayor abhāvāt| sāṃsārikarāgakṣayārtham| mahārāgo vajrānañgo'kṣaraḥ prabhus traidhātuke vibhuḥ| sarveṣāṃ tatpadavāñchayābhimatatvāt| kiṃ punaḥ pratiṣṭhitanirvāṇam ity āha| virāgād yad ityādi sugamam|
etad eva prapañcenāha| śukram evendur amṛtatvāt| tasyodaya
(59)
uṣṇīṣe lalāṭe pūrṇā prathamānandādibhedena śukrapratipad dvitīyā tṛtīyā caturthī pañcamī lakṣaṇā| uddeśamātreṇānūktatvāt| kaṇṭhe hṛdaye ca ṣaṣṭhī saptamy aṣṭamī navamī daśamy aparā pūrṇā| nābhau guhya ekādaśī dvādaśī trayodaśī caturdaśī pañcadaśī tṛtīyā pūrṇā| athety ānandādibhedena tripūrṇā gate bodhicitte| guhyapadmā tayā bodhicitte guhye gate paramānandād yā ṣoḍaśī kalā sā maṇipadme vajramūrdhnigā bhavati|
tasmād ūrdhvaṃ kṛṣṇapratipadāgame virāgapraveśakāle cyutikālaḥ syāt| tato virāgato ravir ūrṇāsthānaṃ yāti|
asya sūryasya ṣoḍaśī kaloṣṇīṣakamale gatā saiva naṣṭacandra ity ākhyātaḥ| sūryeṇa rajorūpeṇācchāditatvāt| ato rāgasaukhyato viraktir bhavati| atas tad varjanīyam|
maraṇe maraṇakāle sarvadehināṃ devāsuramanuṣyāṇāṃ
(60)
candrāmṛtaṃ bodhicittam| adhaḥ śukramārgeṇa yāti| sūrya eva rajo rajodharmitvād ūrdhve yāti| rāhuvijñānam avidyāprāṇasavalitavijñānaṃ bhāvalakṣaṇe sukhaduḥkhādikarmalakṣaṇe|
yata evam ato'smāt kāraṇāc candrāmṛtasya śukradhātor ūrdhvam upari gamanam upadeśataḥ| adhaś cārkarajaso gamanaṃ rāhulakṣaṇasya vijñānasyākṣarasukhaṃ gamanaṃ kartavyam iti|
etac ca bhagavatācaritam ity ādarśayati| ūrṇetyādi| candrāmṛtasya śukradhātoḥ pūrṇimā pūrṇatvaṃ buddhānām ūrṇābje bhavati| arkarajaso'māvāsī guhye bhavati| tayoḥ pūrṇimāmāvāsyoḥ kalā yathākrameṇoṣṇīṣe vajramaṇau ca buddhānām iti|
(61)
tad uktaṃ nāmasaṃgītyām|
ekapādatalākrānto mahīmaṇḍatale sthitaḥ|
brahmāṇḍaśikharākrāntaḥ pādāṅguṣṭhanakhe sthitaḥ|| iti|
vajrapadaṃ jñānapadaṃ viparītam iti pratiṣṭhitam ity arthaḥ| apratiṣṭhitaṃ punar edṛśam ity āha| apratiṣṭhetyādi| dhātavaḥ pṛthivyādayo'viparītam nirāvaraṇatvaṃ yānti| anye te dhātavo'bhedyāḥ|
śiraso lambikānāṃ kāyavākcittajñānabindūnām ūrdhve krameṇākṣarasukhapūritānāṃ catuṣkāyaviśuddhim āha| maṇāv ityādi| mahāsukhād iti vajrāgrād viparīteṇa yaḥ kāyabinduḥ sa turyākṣayataḥ śuddhakāyaḥ| sa ca vajrāgre sthitaḥ| tasmād maṇau cittaṃ suṣuptakṣayataḥ| guhye vāk svapnakṣayataḥ| nābhau kāyo jāgradavasthākṣayata iti| ete ca dharmasaṃbhoganirmāṇakāyāḥ śuddhakāyāt spharanti|
(62)
adha-upāyasyety adho vajrāgrād yat spharaṇaṃ kāyānāṃ tad upāyaś ca prajñāyāḥ punar ūrdhvato bhavet| tad darśayati| lalāṭa ityādi| asyāḥ prajñāyāḥ kāyavajro lalāṭe pūrvavad viparīteṇa| evaṃ kaṇṭhe hṛdnābhipaṅkaje yathākrameṇa vākcittajñānavajrāṇi| etena nirmāṇādyāḥ spharantīti|
akṣarasukhavṛddhyartham āha| karmetyādi| nanu candrasya sarvadā vṛddhyā bhavitavyam ity āha| na hi vṛddhiḥ syād iti| tathā hi yo vṛddhas tenāvaśyaṃ kṣayiṇā bhavitavyam anyathā nityatāprasaṅgaḥ| na ca nityo'rthaḥ kaścid asti yena tasya nityatvaṃ parikalpanīyam| utpādavyayadharmitvāt sarvadharmāṇām| tathāpy utpādavyaya eva tasya svabhāvo bhavatu|
ko doṣa ity āśaṅkyāha| svabhāvābhāvadharmāṇām iti svabhāvasyābhāvo yeṣāṃ dharmāṇāṃ yaḥ kṣayotpādaḥ sā māyā|
(63)
ata eva na kṣayaṃ yānti bhūtāni na jāyanta iti saṃyogaviyogamātratvāt|
spandādibhāvanām āha| svaprajñetyādi| svaprajñāyā vividhalakṣaṇayāliṅgitaṃ cittaṃ padme guhye gataṃ yad maṇau vajramaṇau tac candragataspandarūpeṇa spandabhāvanā| tatraiva maṇau yadā niṣpandatā tadākṣarabhāvanā|
kāyavākcittanāḍīṣu vāmadakṣiṇamadhyanāḍīṣu kāyavākcittair bhāvanā iti| yadā hi gurūpadeśena praviṣṭe marīcikādimārge tadā tisro nāḍyaḥ pariśuddhā bhavanti| tāsu pariśuddhāsu yadi kāyanāḍyāṃ prāṇo vahati tathāpi prāṇāyāmaḥ kartavyaḥ sa ca kāyabhāvanā| evaṃ vāgnāḍyāṃ vāgbhāvanā| cittanāḍyāṃ madhyamāyāṃ cittabhāvaneti| yadā śaṅkhinīnāḍyāṃ śukranāḍyāṃ jñānabhāvanākṣarabhāvanā bhavati tadā samāhāra ekatvaṃ trivajrāṇāṃ trināḍīnām|
caturbindūnāṃ bandhanam āha| prajñetyādi| prajñārāgadrutāṇām iti caṇḍālījvālena drutāṇām| śiraso lalāṭāt pūrṇāpadaṃ guhyasthānaṃ bandhanaṃ paramārthata iti prāṇabandhanenākṣarasukhena|
vāsanety āvaraṇaṃ tasyā haraṇam apanayanam| tat pūrṇa-
(64)
candrasya na cchedo na ca tasya pūraṇam|
tathoditaṃ jñānaṃ kramāt spandādibhedena bhūmibhir muditādyābhir ūrdhvam uṣṇīṣe pūrṇatāṃ yāti| kleśādīnām āharaṇam apanayanaṃ pūrṇaḥ| na jñānacchedo na ca tasya pūraṇam iti|
śaśāṅkasyāṅkaṃ śaśāṅkaṃ madhye śaśāṅkasya madhyaśaśāṅkaḥ| tena pūrṇāyāṃ na śaśī sthiraḥ pratipatpraveśakālakṣayatvāt| tathākṣare sukhe cittam asthiram| saṃsāravāsanā kṣarasukhalakṣaṇādyāliṅgitatvāt|
jagatāṃ rāgavirāgābhyāṃ pūrṇā na pratiṣṭhitety āha| utpattītyādi| ekakṣaṇābhisaṃbuddhaṃ yadā pūrṇāyāṃ guhyapadme niścalaṃ cittaṃ bhavet tadā taccittaṃ vajraṃ vajramaṇau niṣpandena sarvakṣaṇapūrakaṃ dvyayutadvyaṣṭaśataśvāsalakṣaṇam|
(65)
evam asya cittasya na śuklapakṣe rāge sthitiḥ| na ca gamanam asite pakṣe virāge| ate eva pakṣadvayamadhyasthaṃ pūrṇāyāṃ gatam advayam apratiṣṭhitam|
tad uktaṃ nāmasaṃgītyām|
ekakṣaṇābhisaṃbuddhaḥ sarvakṣaṇavibhāvakaḥ|
akalaḥ kalanātītaś caturthadhyānakoṭidhṛk|| iti|
sāṃsārikakramam āha| uṣṇīṣetyādi| tasya bodhisattvasyoṣṇīṣād udayaṃ pūrṇā vajramaṇau bhavet| sa virāgāt kalāhāniḥ kalāya cayo vajrāt sakāśād bhavati| tato hānir virāgasya prapūrṇatā|
punar apy evam udayaḥ punar maṇau pūrṇatā| sa virāgāt kalāhānir na dehināṃ jñānahānir iti| jñānahānyā maraṇam āha|
(66)
pūrṇāśabdasyārtham āha| asya bodhicittasya mahāsukhasvabhāvaḥ sa pūrṇāśabdena bhaṇyate| mahāsukhasvabhāvaṃ vihāyānyabhāvāntaraṃ viṣayendriyalakṣaṇaṃ sṛṣṭisaṃhārakārakam utpādavyayalakṣaṇam|
etad eva spaṣṭayati| bhāvād ityādi| svapakṣābhyāṃ śuklakṛṣṇābhyām ayanābhyām uttaradakṣiṇābhyām|
asya bodhicittasya niścalasya pūrṇāyāṃ guhyapadma ūrdhvam bhūmibhiḥ paripūrṇatā| dvyayutetyādi vyākhyātārtham| pakṣadvayaṃ vāmadakṣiṇaṃ meṣavṛṣādidvādaśarāśilakṣaṇam ākramya nirudhya dvādaśākārasatyārthaṃ dvādaśabhūmilābhataḥ| ṣoḍaśākāram akṣaraṃ sāṃsārikaṣoḍaśakalākṣayataḥ|
paramādvayaṃ karmavātanirmitakalpanābhāvāt| ekārtham advayam iti yad advayadharmaṃ tad ekārtham ubhayapa-
(67)
kṣābhāvāt| virāgādimahārāgam iti sekakṣaṇaś caturthaḥ| tad uktaṃ nāmasaṃgītyām|
virāgādimahārāgo viśvavarṇo jvalaprabhaḥ|
saṃbuddhavajraparyaṅko buddhasaṃgītidharmadhṛk|| iti|
asaṃkliṣṭam anāvilam ubhayapakṣābhāvāt| grāhyacittagrāhakacittayor aikyaṃ darśayati| yathety upadarśane| nadīnām udakaṃ praviṣṭaṃ tat samudre samatvaṃ yāti| tathāyaṃ bhāvasamūhaḥ sthiracalātmako'kṣare sarvākārabimbe samas tulyo'kṣaro bhavati|
etad eva punar dṛṣṭāntenāha| ayaṃ dhātusamūho lohādiko raseṇa pāradeṇa bhakṣito yathā rasatvaṃ yāti tat samo bhavati| yathā vā bījaiḥ kādravādikaiḥ kṣityādiko dhātusamūho bhakṣito bījasvabhāvatvaṃ yāti| sa eva phalakāle phalodayakāle mānavarjitaḥ saṃkhyārahito bhavati|
(68)
evaṃ bhāvasamūho'pi sthiracalātmakaḥ paramākṣarabhakṣitaḥ sarvākārabimbena nirāvaraṇīkṛtaḥ paramākṣaratvam āyāti| sarvākārasvarūpadhṛg bhavatīty arthaḥ|
viṣadṛṣṭānte sukhasya vyāpitvam āha| na daṃśa ityādi| pūrṇāvasthāṃ vyāpitvaṃ gate viṣe daṣṭako daṃśasthāne vedanāduḥkhaṃ na vetti| na cānyatrāpi kutracit kāyasthāne vetti| na ca viṣayān rūpādīn indriyadvāraiś cakṣurādibhir vetti|
evaṃ citte pūrṇakalāṃ gate vyāpitvaṃ gate na yogī vajramaṇau vetti satsukhaṃ nānyatrāpi na viṣayān indriyadvārair iti|
uktaś cakrasaṃvare|
sarvataḥ pāṇipādādyaṃ sarvāto'kṣiśiromukham|
sarvataḥ smṛtimāl loke sarvam āvṛtya tiṣṭhati|| iti|
ekadeśe sthitam api romakūpasaṃdhiparyantaṃ krāmatīti|
(69)
rasalohadṛṣṭāntenāha| yathetyādi| ekapradeśe vajramaṇau| kāmāgnisaṃtaptaṃ caṇḍālījvalanasaṃtaptam| vāsanā rāgādilakṣaṇā|
yathā śilā mahāmaṇisparśāt taptatāṃ prabhāsvaratāṃ yāti tathākṣarasukhasparśāt sukhatām eti yāti vai niścitam|
kiṃ punaḥ paramārthataḥ paramārthasatyato jñānasadbhāvaḥ prabhāvo vitarkaḥ| kiṃ tarkaṇīyaś cittasyāvedhanaṃ prati malāgantukaliptasya naivety arthaḥ|
ayam āgantuko malo na citte| atha citta utpanne sati paścād utpannas tadartham āha| na cittāt sakāśāc cirakālikaḥ paścād utpanna ity arthaḥ| atha cittaṃ vinā jātas tadartham āha| na cittena vinā jāta iti| kiṃ citte'vyayatvena saṃsthita ity āha| na citte saṃsthito'vyaya iti|
yadītyādinaitad eva vicārayati| sugamaṃ ślokadvayam| atra tāmradṛṣṭānte bodhayati| yady ayam āgantuko malas tāmre tadā pūrvaṃ tāmraṃ kālikārahitam| yadā cirakālī malaḥ paścāt tāmrasya sadbhāvas tadā tasya malasya kutaḥ kasmāt saṃbhavaḥ|
atha tāmreṇa vinā jātas tadākāśakusumasyāpi saṃ-
(70)
bhavaḥ| atha tāmre'vyayatvena saṃsthitas tadā siddharaseṇāpy apanetuṃ na śakyate| tasmāt sarvam etad yuktyā na saṃgacchati|
tasmād idam atrārthasatyam| tāmreṇa sahotpanno'py ayaṃ kāliko rasayogād naśyati na paścād na pūrvaṃ na tadrahita iti|
evaṃ cittasyāpi darśayati| tadvad ityādi| āgantukaśabdaḥ kathaṃ boddhavya iti ced ucyate| ā samantād gamanaśīla āgantukaḥ|
vākpathātītatvam akṣarasyāha| vaktuṃ netyādi| yauvane surate prāptā svayam eva vetti| samādhirahitaiḥ śūnyatāsamādhirahitaiḥ| asukhād dhetoḥ|
cyutir eva saṃsārahetur iti pratipādayati| cyutair ityādi| evam ity uktakrameṇa sattvānāṃ virāgasaṃbhūtiḥ| nānyathetyādi| yadi teṣāṃ virāgasaṃbhūtir na bhavati tadā nānyaprakāreṇa
(71)
teṣāṃ bhavaḥ saṃsāraḥ|
tasmāt saiva kāraṇam ity arthaḥ| yeneti cyutisukhavivarjaneṇa| kāmuka ityādinākṣarasukhe yatnam āha| duḥkhaṃ rāgavirāgalakṣaṇam| ādhāre cyutim āpanna ādheyasya virāgatā bhavati| ataś cyutirāgaṃ vivarjayed ity uktena saṃbandhaḥ|
vaimalyasyāvasthām āha| akṣaretyādi| akṣarodbhavakāyasya cittasyorṇācakramadhyagatasyālikālyor vāmadakṣiṇayoḥ samāyogo mīlanaṃ madhyamāpravāhitvaṃ hūṃkārādyaṃ ca madhyamāpravāhanibandhanaṃ neṣyate| etac ca paramākṣarajñānasiddhāv evāryapuṇḍarīkapādaiḥ prapāñcitam iti na vistāryate|
idānīṃ pratītyahetuphalaṃ bhāvam āha| bimbam ityādi| śūnyād ākāśād udbhavaṃ bimbaṃ sarvākā....
(72)